நெஞ்சம் இனிக்கிறது; தஞ்சம்புகத் துடிக்கிறது!

நெஞ்சம் இனிக்கிறது; தஞ்சம்புகத் துடிக்கிறது!

(இசைப்பாடல்
தாளம் - ஆதி
இராகம் - மிசிரபீலு)

(எடுப்பு)

நெஞ்சம் இனிக்கிறது - உன்பால்
தஞ்சம் புகத் துடிக்கிறது!
வெஞ்சமரில் வெல்லும் உன் தடந்தோள் கண்டு
அஞ்சுவர் பகைவர்; எனப் பெரும் புலவர்,
கொஞ்சுதமிழில் உன் கொற்றம் வாழ்த்துதல் கேட்டு
மிஞ்சுது காதல்; அதனால்
நெஞ்சம் இனிக்கிறது - உன்பால்
தஞ்சம் புகத் துடிக்கிறது!

(தொடுப்பு)

வஞ்சி எனக்கோர் வரம் தரவேண்டுமென
கெஞ்சியுன்னைக் கேட்கின்றேன் - என்பால்
எஞ்சியுள்ளது உயிர் ஒன்றுதான்; எனினும்
வஞ்சமின்றி வழங்கிடுவேன் உனக்காகக் கண்ணா! - உன்
மஞ்சத்து மயிலாக எனை ஆக்கிடுக மணிவண்ணா!
அதை நினைத்தாலே - கனவில் வந்து நீ எனை
அணைத்தாலே;
நெஞ்சம் இனிக்கிறது - உன்பால்
தஞ்சம் புகத் துடிக்கிறது!

(முடிப்பு)

மலைச்சாரல் காட்டோரம் ஒரு நாள் - மனம்
மயக்குகின்ற மாலை நேரம் சென்றேன்.
குலையாகப் பழம் தொங்குகின்ற மரத்தின்

கிளையொன்றில் பெருந் தேன்கூடு கண்டேன்.
கிட்டாதோ தேன் துளிகள் என்று
முற்றாக முடமான ஒருவன்
அடிமரத்தின் வேரின் மேல் அமர்ந்து
அகங்கையில் தேன் சொட்டுமென்று
ஆவலாய் முகம் வைத்துக்கொண்டு
அந்தோ; வெறுங்கையைச் சுவைத்துக் கொண்டிருந்தான்!
அவன் நிலைதான் என் நிலையோ கண்ணா?
‘ஆம்’ என்று நீ சொல்லிவிட்டால் பெண் நான்
அந்த முடவன் போல் செயல்படத்தான் வேண்டும்; உன்
அருகில் வரமுடியாமல் ஏங்கத்தான் வேண்டும்!
எட்டாத பழமெனினும்
எனக்கு நீ கிட்டிடுவாய் என்று - தவம்
கட்டாயம் இருக்கத்தான் வேண்டும்; உன்
கரம்தனில் ஒருநாள் தவழத்தான் வேண்டும்!
அதை நினைத்தாலே - கனவில் வந்து நீ எனை
அணைத்தாலே;
நெஞ்சம் இனிக்கிறது - உன்பால்
தஞ்சம் புகத் துடிக்கிறது!

செய் தவம் பலிக்கவில்லை யெனில் - என்
சிந்தை கவர்ந்திட்ட சிங்கம் நீ; என்
மெய் தழுவிக் கிடக்கின்ற கற்பனையில்
மிதந்திடுவேன்; அதை எண்ணி மகிழும்போது என்
நெஞ்சம் இனிக்கிறது - உன்பால்
தஞ்சம் புகத் துடிக்கிறது!

*

“குறுந்தாட் கூதளி ஆடிய நெடுவரைப்
பெருந்தேன் கண்ட இருக்கை முடவன்,
உட்கைச் சிறுகுடை கோலிக் கீழ்இருந்து,
சுட்டுபு நக்கி யாங்குக் காதலர்
நல்கார் நயவார் ஆயினும்,
பல்கால் காண்டலும், உள்ளத்துக்கு இனிதே!”

*

மூல மேற்கோள்(குறுந்தொகை - பாடல் : 60
பாடியவர் : பரணர்)

பொருள் விளக்கம் :

குறுந்தாள் இருக்கை முடவன் = குறுகிய கால்கள் கொண்டு
நடக்கவும் நிற்கவும் முடியாமல் ஓரிடத்திலேயே இருக்கின்ற
முடவன். கூதளி ஆடிய நெடுவரை = கூதளங் கொடி யாடு
கின்ற மலைப்பகுதியில். உட்கைச் சிறுகுடை கோலிக்கீழ்
இருந்து = உள்ளங்கையை உண்கலம் போலக் குவித்துக்கொண்டு.
சுட்டுபு நக்கியாங்கு = (தேனடையைச்) சுட்டிக்காட்டியவாறே
வெறுங்கையைச் சுவைப்பது போல. நல்கார் = விரும்பாதார்.
நயவார் = அன்பு செலுத்திடார். பல்கால் காண்டல் = பல
முறையும் காண்பது.

*