பல்லி சொல்லுக்குப் பலன்!

பல்லி சொல்லுக்குப் பலன்!

(ஏற்ற இசையில் பாடுக)

(எடுப்பு)

பல்லியின் சொல்லுக்கு நிச்சயம் பலனுண்டு — இதைப்
பகுத்தறிவாளர் மறுப்பார் எனினும்
பல்லியின் சொல்லுக்கு நிச்சயம் பலனுண்டு!

(தொடுப்பு) (1)

எல்லையற்ற கவலை இனியென் தலைவிக்கு எதற்காக?
தொல்லையை நீக்கிடத் துணைவர் வருவார் விரைவாக! - இந்தத்
தோழியை நினைத்து வாழ்த்திடுவாய் அதற்காக!
ஆழிபோல் இன்பம் காத்திருக்குதுனக்காக!

(பல்லியின் சொல்லுக்கு)

(தொடுப்பு) (2)

பாடுபட்டுப் பொருள் தேடப் பயணம் தொடர்ந்து
காடு; பட்டுப்போன கொடும் பாலையில் நடந்து
கூடுவிட்டுப்போன ஆவிபோல — உன்னை
வாடவிட்டுப் போனவர்; வந்திடுவார் இன்னே!

(பல்லியின் சொல்லுக்கு)

(தொடுப்பு) (3)

மூடநம்பிக்கையில் உனை மூழ்கடிக்க — நான்
நாடகம் ஆடுவதாய் நினைக்காதே! உன்
எழில் நிலா முகத்தை; இமையுடைத்துப்
பொழிகின்ற கண்ணீரால் நனைக்காதே!

(பல்லியின் சொல்லுக்கு)

(தொடுப்பு) (4)

பாலையில் கள்ளிக்காடுகள் பல உண்டாம் — ஆங்கு
பல்லிகள் பல துள்ளி ஓடுதல் உண்டாம் — அதில்
ஆணொன்று பெண்ணைக் கூடிடக் கொண்டதாம் ஆசை!

அதற்காகவே அது எழுப்பியதாம் காதல் ஓசை!

(பல்லியின் சொல்லுக்கு)

(தொகையறா)

விரல் நகத்தால் அம்பின் கூர்மையை நெருடி
வேடனொருவன் அதைச் சரிபார்க்கும் வேளை
எழுந்திடும் ‘டிக் டிக்’ ஓசையைப் போலே — காதில்
விழுந்திடும் அந்தப் பல்லியின் ஓசை; அதைக்
கேட்டதும் உன் தலைவர்க்குப் பிறந்திடும் ஆசை; இந்த
வீணையை மீட்டிட வந்தேனென்று முறுக்குவார் இளமீசை!

(பல்லியின் சொல்லுக்கு)

*

“உள்ளார் கொல்லோ தோழி கள்வர்தம்
பொன்புனை பகழி செப்பம் கொண்மார்
உகிர்நுதி புரட்டும் ஓசை போலச்
செங்காற் பல்லி தன்துணை பயிரும்
அங்காற் கள்ளியம் காடு இறந் தோரே”

*

மூல மேற்கோள்(குறுந்தொகை பாடல் : 16
பாடியவர் : பாலைபாடிய பெருங்கடுங்கோ)

பொருள் விளக்கம் :

உள்ளார் கொல்லோ = நினைக்காதிருப்பாரா?
பொன்புனை = இரும்பாலான. பகழி = அம்பு. செப்பம்
கொண்மார் = சரிசெய்யும் பொருட்டு. உகிர்நுதி = நகத்து நுனி.
பயிர் = ஒலிக்குறிப்பு. காடு இறந்தோர் = காட்டைக் கடந்தோர்.

*