காட்சி 29] [கருடன் பதிப்பகம்

[பரந்தாமன் வருதல்]

கருடன் : வாப்பா ! இரண்டு மூணு வாரமா ஏக ஜாலியா இருந்திருக்கும் life ..

பரந்தாமன் : பாவம்... சென்னையிலே குடும்பம் அமைத்து என்னை சம்சார சிறையிலே போடலாமென்று துடித்தாள் பாமா... எங்கே போனாளோ என்ன ஆனாளோ!....

கருடன் : ம்... சம்சாரமாவது ஒண்ணாவது மனுஷன் free-யா இருக்கணும், என்னாட்டம். நமக்கு உதாரணமாகத்தானே கடவுள் படைத்திருக்கிறான், மலருக்கு மலர் தாவுகிற......

பையன்: மரத்துக்கு மரம் தாவுகிற மந்தி

கருடன் : டே...

பையன்: மறந்துட்டிங்களோன்னு ஞாபகப்படுத்தினே.

கருடன் : கம்பர் மகன் அம்பிகாபதி! சும்மாயிருடா முந்திரிக்கொட்டை!

(தெருவிலே தொழிலாளர் ஊர்வலம் செல்லும் ஒலி கேட்கிறது.)

## கோஷம்

சிவசக்தி மில் தொழிலாளர் கூலியை உயர்த்து. தொழிலாளர் சம்பளத்தை உயர்த்து.. தொழிலாளர் சம்பளத்தை உயர்த்து.

பரந்தாமன் : என்னடா?

பையன்: நமக்குச் சம்மந்தமில்லை.

கருடன்: நமக்காமில்ல நமக்கு ! இவரும் சேந்துக்கிறாரு விஷயத்தை சொல்லு கழுதை!

பையன் : மில் தொழிலாளிங்க சம்பள உயர்வுக்காக கிளர்ச்சி பண்றாங்க!...

பரந்தாமன் : அப்படியா? அப்ப நமக்கு சம்பந்தமில்லை.

கருடன்: ஏன் இல்லை? எனக்கு ஒரு வழி தோணுது. இந்தக் கிளர்ச்சியை சாதகமாக்கிக்கிட்டு பாட்டாளிகளைப்பத்தி ஒரு புஸ்தகம் எழுதினா இந்தச் சமயம் நல்லா விக்கும்.

பரந்தாமன் : ஆமாம்.... இன்றைக்கே எழுத ஆரம்பிக்கிறேன். பெயர் என்ன வைக்கலாம்—புஸ்தகத்துக்கு... ஆங்...சரி.... பாட்டாளியின் குரல்.

கருடன் : சபாஷ்! பாட்டாளியின் குரல். என்ன மூளை! என்ன மூளை!

பையன் : முதல்ல என் குரலை கொஞ்சம் கவனிங்க!

பரந்தாமன் : என்னடா?

பையன்: எனக்கு சம்பளம்.

கருடன் : (கோபமாய்) டேய் ! மில் தொழிலாளிகளுக்காக புஸ்தகம் எழுதினா...

பையன்: நானும் ஒரு தொழிலாளிதானுங்க!...

கருடன் : பெரிய தொழிலாளி இவுரு ! பரந்தாமா! நீ எழுத ஆரம்பிச்சுடு ! லாபத்திலே உனக்கு கால், எனக்கு முக்கால்.

பையன்: எனக்கு...

கருடன் : அறை ! (அறைதல்)