காட்சி 7

[இமயாவும் விபீஷணனும்]

விபீஷ:- அடுத்த மாதம் படையெடுப்பு. மகா வீரருக்குச் சிறை. புத்தன் சித்திரவதை. இன்பபுரியில் நமது ஆட்சி

இமய:- இன்பபுரிக் கோட்டைக்குள் நுழைவது!....

விபீஷ:- சுலபம், சுலபம்! குதிரைக்குள் எலி இருப்பது போல், கோட்டைக்குள் நமது ஆள் வைத்திருக்கிறேன். கோட்டையை முற்றுகையிடும் வழிகள், இன்று குறித்தனுப்பிவிட்டான், இனிமேல் என்ன?

இமய:- ஒன்றுமில்லை.

விபீஷ:- வெற்றி நமக்குத்தான். சந்தேகமில்லை.

இமய:- ஆமாம். சந்தேகமில்லை. வெற்றி நமக்குத்தான்.

விபீஷ:- இன்பபுரியில் நமது ஆட்சி எப்படி இருக்கும்?

இமய:- எப்படி இருக்கும்?

விபீஷ:- அழியாத ஏகாதிபத்தியமாக இருக்கும்.

இமய:- ஆமாம்! அப்படித்தான் இருக்கும். ஆனால் விபீஷணரே! பிரஜைகள் புரட்சி செய்தால்?

விபீஷ:- செய்யவிடமாட்டேன்.

இமய:- விடமாட்டீர்! அடக்குமுறைச் சட்டத்தைப் போட்டு......

விபீஷ:- அல்ல அல்ல! ஆயுதம் வேறு இருக்கிறது.

இமய:- இருக்கும், இருக்கும், வைத்திருப்பீர்.

விபீஷ:- மக்களைப் பல ஜாதிகளாக இன்னும் பிரித்துக் கொண்டே போகவேண்டும்.

இமய:- ஆமாம். பிரித்துக்கொண்டே போகவேண்டும்.

விபீஷ:- அதுவும் கடவுள் பேரால் செய்யவேண்டும்.

இமய:- ஆமாம்! கடவுள் பேரால் செய்யவேண்டும்.

விபீஷ:- அவர்களுக்குள் புகைச்சல் ஏற்பட்டால்தான், புரட்சி ஏற்படாது. நாம் வாழலாம்.

இமய:- புத்தன் அவர்களை ஒன்று சேர்த்துவிட்டால்?

விபீஷ:- கனவு! கனவு! கள்ளையும், சாராயத்தையும் கலக்க எண்ணுகிறான் மூடன்.

இமய:- மூடன்!

விபீஷ:- பிறகு நாட்டில் அவர்களுக்குள்ளேயே புரட்சி. அரசன் அதை அடக்க ஆரம்பிப்பான். நாம் சுலபமாக உள்ளே நுழைந்துவிடலாம்.

இமய:- அப்படியானால்; அடுத்தமாதம் நான் சக்கரவர்த்தி!

விபீஷ:- சந்தேகமா? முதலில் துரோக வேலையில் வெற்றி பெறவேண்டும். பிறகு சிம்மாசனம் தானே வரும்.

இமய:- தானே வரும்!

விபீஷ:- இந்தக் கொள்கைக்குப் பெயர்தான்.....

இமய:- விபீஷணக் கொள்கை!

விபீஷ:- இமயா! பழைய விபீஷணர் கொள்கையே இது தான்!

இமய:- நல்ல கொள்கை. நாட்டுக்குத் தேவையான கொள்கை.

(குமரி வருகை. 1-வது காலி விபீஷணனிடம் கூறுதல்.)

இமய:- என்ன ரகசியம்?

விபீஷ:- ஒன்றுமில்லை, தனிப்பட்ட விஷயம்.

இமய:- ராஜப் பிரதிநிதி, இமயாவுக்குத் தெரியாத ரகசியமா?

விபீஷ:- இமயாவுக்கு வேண்டியது, இன்பபுரியின் மகுடம்.

இமய:- ஆமாம்! மகுடம்!

விபீஷ - மகுடம்! மங்கை! வேண்டுமானால் பேசாதீர்.

இமய:- பேசவில்லை.

(இமயா வாயில் கைவைத்து பொத்திக் கொள்கிறான்)