காட்சி 4

(மது விருந்துக் காட்சி-இரு பெண்களின் சில நிமிட நடனம்)

விபீஷ:- மது, மங்கை, இரண்டுந்தான் கவலை தீர்க்கும் மருந்துகள்.

இமயா:- ஆமாம். மருந்துகள்! கடலெல்லாம் மதுவாகி விட்டால்..........

விபீஷ:- மணல்களெல்லாம் மங்கையராக்கி, மதுக்கடலில் ஜலக்கிரீடை செய்யலாம்!

இமயா:- மாளிகை முழுவதும் மாதர்கள், மாதர்கள் கையிலே மதுக்குடங்கள். விபீஷணரே! அந்த இடம்......?

விபீஷ:- அசல் இந்திரலோகந்தான்! மதுக்கோப்பைகள்;

அதைப் பிடித்திருக்கும் மலர்க் கரங்கள், அடா! டா டா! இன்பம்! இன்பம்! இன்பம்!!

இமயா:- இன்பம்! இன்பம்! இன்பம்!! மதுவை அந்த மாதர்களின் வாயில் ஊற்றி, அதை உறிஞ்சிக் குடித்தால்?

விபீஷ:- மலரில் வழியும் தேனே, வண்டு குடிப்பதுபோல், மநோகரமாய் இருக்கும்.

இமயா:- பேஷ்; விபீஷணரே! கவிஞன்போல் பேசுகிறீர்.

விபீஷ:- (மதுவைக்காட்டி) எல்லாம் இந்த மகேஸ்வரியின் அருள்.

இமயா:- ஆஹா! அருளே அருள்!

(ஒரு பெண்ணின் சிலையை உற்று நோக்க, அது மகாவீரர் போலத் தெரியவே)

இமயா:- மகாராஜா! மகாவீரர் நம்மையே பார்க்கிறார். மடையர்.

விபீஷ:- (சிரித்தபடி) மண்ணங்கட்டி ராஜா!

(சிலையை உதைக்கவே, அது விழுகிறது)

இமயா:- நன்றுகச் சொன்னீர். இந்தச் சிலை இருக்குமிடத்தில், என் சிலையல்லவா இருக்க வேண்டும்?

விபீஷ:- இங்கென்ன! இமயாவை இன்பபுரியின் ரத்ன சிம்மாசனத்தில் இருக்கவைக்கிறேன்.

இமயா:- இருக்கவைப்பீர். ரத்ன சிம்மாசனம்! அதனருகே பொன் குடத்தில் புதிய மது. வைரக் கிண்ணத்தால், அதை மொண்டு என் வாயில் ஊற்றும் வனிதாமணிகள், விபீஷணரே, விரைவில் அந்தப் பதவி வரவேண்டும்.

விபீஷ:- வந்தே தீரும்.

இமயா:- வந்தே தீரும்.

விபீஷ:- வலையை வீசிவிட்டேன். விரைவில் சதிவேலைகள் முடிந்துவிடும். பாக்கியிருப்பது படையெடுப்பு. இன்பபுரிக் கோட்டையின் முற்றுகை! மன்னன் ஓட்டம்! நமது ஆட்சியின் ஆரம்பம்.

இமயா:- புத்தனை மறந்துவிட்டீர்.

விபீஷ:- அவன் கன்றுக்குட்டி, என்னைக் கண்டாலே கலங்கிவிடுவான்.

இமயா:- கலங்கிவிடுவான் கோழை! விபீஷணரே! படையெடுப்பதென்றால், நானும் வரவேண்டுமோ?

விபீஷ:- வேண்டாம், வேண்டாம்!

இமயா:- வேண்டியதில்லை. அற்ப விஷயத்திற்கு நான் வேறு.

விபீஷ:- இமயா! நீர் பாதுகாப்பிலிருக்கலாம்.

இமயா:- பாதுகாப்பென்ன! ஒரு பத்தாயிரம் வீரர்களோடு, ஒரு குகைக்குள் இருந்தால் போகிறது. எனக்கொன்றும் பயமில்லை.

விபீஷ:- நீர்தான் அஞ்சா நெஞ்சம் படைத்த வீர சிங்கமென்று, நாடெல்லாம் சொல்கிறார்களே!

இமயா:- ஆ! அப்படியா சொல்கிறார்கள்? (நெஞ்சைத் தடவிக்கொண்டு)

விபீஷ:- ஆமாம்.

இமயா:- உம். படைத்திட்ட நிறைய பணம் வேண்டுமே!

விபீஷ:- பண வசூல், நடந்துகொண்டுதானிருக்கிறது. போரை முன்னிட்டு, நம் பொக்கிஷத்தைப் பாதி நிரப்பிவிட்டேன். (மதுவைக் கோப்பையில் ஊற்றுகிறான்) எங்கு பார்த்தாலும் நம் ஆட்கள், வரி வசூல் செய்கிறார்கள்.

இமயா:- வரியா?

விபீஷ:- ஆம்! பிறந்தால் வரி, வாழ்ந்தால் வரி! இறந்தாலும் வரி! ஒரே வரி மயம்.

இமயா:- வரி! மகாராஜாவுக்குத் தெரிந்தால், மகா ஆபத்தாயிற்றே!

விபீஷ:- பைத்தியம்! உளறாதீர்! மகாராஜாவின் ஆணிவேரையே பிடுங்க அருமையான திட்டம் போட்டிருக்கிறேன்.

இமயா:- குடிஜனங்கள் சக்ரவர்த்தியிடம் முறையிட்டால்?

விபீஷ:- குடிஜனங்கள்! குடலைப் பிடுங்கிவிடுவேன். வாயைத் திறக்கவே மாட்டார்கள்!

விபீஷ:- உஸ், பேசாதீர்! முல்லைக் காட்டின் சாதாரண ராஜப் பிரதிநிதி............இன்பபுரியின் மகுடம், இதில் எது வேண்டும்??

(இரண்டு மதுக்கோப்பைகளை, தனித் தனியே சுட்டிக் காட்டுகிறான்)

இமயா:- மகுடம்! மகுடம்! இன்பபுரி மகுடம்!

விபீஷ:- மகுடம்!

இமயா:- மகுடம்!

விபீஷ:- மது!

இமயா:- மது!

விபீஷ:- மங்கை!

இமயா:- மங்கை!

விபீஷ:- வேண்டுமானால் எதிர்த்துப் பேசாதீர்.

இமயா:- பேசவில்லை.

(இரண்டு மதுக் கோப்பைகளையும், ஆளுக்கொன்று எடுத்துச் சுவைக்கின்றார்கள்)