காட்சி 48]

[தனவணிகர் வீடு

குழந்தையுடன் தனவணிகர் உள்ளே நுழைகிறார். அவரது மனைவி குழந்தையை வாரியணைத்துக் கொண்டு ஆண்டவனுக்கு நன்றி செலுத்துகிறாள். அவளும் கேட்கவில்லை; முத்தாயி எங்கே என்று! கேட்பதற்கு ஒருவன் இருக்கிறானே; உரிமை படைத்தவன் அவன் கேட்கிறான்.

தனவணிகர்: நான் போகவில்லை யென்றால் குழந்தை அவ்வளவு தான்! காற்றில் மரக்கிளை முறிந்து விழுந்து...

முத்தன்: ஆ! முத்தாயி எங்கே?

தனவணிகர்: அடடே!... நான் அவசரத்தில் அவளை மறந்தே விட்டேன்.

முத்தன்: மறந்து விட்டீர்கள்; என் மனைவியை மட்டும் அல்ல; உங்கள் சீமான் இனம்; இரக்கமெனும் ஒரு பண்பையே மறந்து பல நாளாயிற்று!

வேகமாக ஓட ஆரம்பிக்கிறான். வீட்டுக்காரர் கண்ணில் படும் வரையில் நொண்டி போல ஓடுகிறான். பிறகு பொன்னன் ஓடவில்லை; முத்தனே ஓடுகிறான்!

★