நகைச் சுவைப் பகுதி. · காட்சி 3

(பெரிய குதிர், கோழி, ஏர், கலப்பை, விரட்டி அடுக்கு. கோழியை வைத்துக்கொண்டு "புறாப் பாட்டு" மெட்டில் கோழியால் தப்பித்ததை சமயோசிதமும், அதிர்ஷ்டமும் பாடிக் கொண்டிருக்கையில், சந்தேகம் கதவைத் தட்டிக் கூப்பிடுகிறான். அதிர்ஷ்டத்தைக் குதிரில் ஒளியவைத்துக் கதவைத் திறக்கிறாள்)

சந்:- சாவித்திரி!

சம:- ஏன் சத்தியவானே?

சந்:- இந்தக் குதிரை வித்துட்டுப் பெரிய குதிர வாங்கணும்னு சொன்னில்ல!

சம:- ஆமாம்!

சந்:- இதை வில பேசி முடிச்சிட்டேன். வாங்கிறவன் வெளியே நிற்கிறான். இப்ப இதைத் தூக்கியாணும்.

சம:- உங்களுக்கு முன்னேயே நான் வேறே ஆளுகிட்டே வித்துப்பிட்டேன். ஓட்டைக்கட்டை இருக்கான்னு உள்ளே இறங்கி பார்த்துக்கிட்டு இருக்காரு! (குதிரிடம்) என்னங்க! இன்னுமா பார்க்கிறீங்க?

அதி:- இல்லை...பார்த்தாச்சு. (வெளியே வந்து) குதிரு நல்ல வசதியான குதிரு. இது இல்லேன்னு உங்களுக்கு ரொம்ப கஷ்டமா இருக்குமே?

சம:- ஆமாம்! (அவனிடம் கேட்கிறாள்) வசதி ரொம்பத்தான்! ஆறு ரொம்பச் சின்னது. இதைவிடப் பெரிசா இருந்தாதான் ஒரு ஆளு கஷ்டமில்லாமே உள்ளே இறங்கலாம்

சந்:- இறங்கக் கஷ்டமே இல்லியே. நான் எத்தனையோ தடவை எறங்கி நெல்லு தள்ளியிருக்கேனே.

அதி:- நெல்லு தள்ள இறங்கலாம்...

சந்:- இந்தா பாருங்க! எவ்வளவு தாராளமா இறங்க முடியுதுன்னு!

(இறங்குகிறான். அவன் குதிரில் இறங்கியதும் அதிர்ஷ்டம் சமயோசிதத்தை அணைத்துக் கொள்ளுதல்)

சந்:- (உள்ளிருந்து) எப்படியிருக்கு பாத்தீங்களா குதிரு, வழ வழன்னு?

அதி:- (சமயோசிதத்தின் கன்னத்தைத் தடவி) ஆமாம் கண்ணாடிமாதிரி இருக்கு!

சந்:- (உள்ளிருந்து) இதுக்கு ஒரு குத்தம் சொல்ல முடியாதுங்க.

அதி:- (அவளை அணைத்தபடி) முடியாது, முடியாது. குத்தம் சொல்றவன் முட்டாள்.

சந்:- அதிர்ஷ்டமான சாமான். நீங்க எவ்வளவு பணம் கொடுத்தாலும் தகும். மதிப்பில்லாதது; எவ்வளவு சித்தடக்கமா எவ்வளவு லட்சணமா இருக்கு பாத்தீங்களா?

அதி:- ஆமாம். இந்த லட்சணந்தானே, என் மனசைக் கவருது.

சந்:- இந்தக் குதிரிலே நெல் எடுக்க எடுக்கக் குறையாதுங்க. இது உங்களப்போல கூட்டாளிகளுக்குக் கட்டாயம் இருக்கணும்.

அதி:- அதுக்குத்தானே வந்தேன். இது நம்ப வீட்டிலே இருந்தா, அப்புறம் கவலையே இல்லை.

(அவனை நோக்கிச் செல்கிறாள்)

சந்:- அப்ப; நீங்களே எடுத்துக்கிறீங்களே?

அதி:- ஆகா, ஆகா! நீங்களே கொடுக்கும்போது.

சந்:- குதிரு விலையிலே மட்டும் குறைக்காதீங்க.

அதி:- வில கிடக்குதுங்க, வில! விரும்புன சாமான் கிடைச்சா சரி!

சந்:- அப்ப தூக்கிக் கொள்ளுங்க!

(அதிர்ஷ்டம் சமயோசிதத்தை தூக்கிக்கொண்டு மெய்மறந்து ஆடுகிறான். இருவரும் ஆனந்தத்தில் இருக்கின்றனர். சந்தேகம் குதிருக்குள் வெளியே தலையை நீட்டுகிறான்)

[முடிவில் சமயோசிதம் குஷ்டரோகி ஆகிறாள். தன் கேவல நடத்தையை நினைத்து வருந்துகிறாள்.......... துறவியான சித்ராவைச் சந்தித்து....... அவள் வழி பின்பற்றுகிறாள்]